Македонскиот кошаркарски ас Перо Антиќ е новиот претседател на Македонската кошаркарска федерација.

Ваквата одлука беше донесена денеска на Изборно собрание во Скопје каде, тој беше едногласно избран како единствен кандидат, откако преостанатите конкуренти се откажаа од трката, а Петар Наумоски кој досега беше предводник на МКФ, одлучи да не бара нов мандат.

Инаку Антиќ, има богата кошаркарска кариера, тој има 36-години а беше дел од Работнички, АЕК, Црвена ѕвезда, Лукоил, Санкт Петербург, Олимпијакос, Фенербахче.

Антиќ почнал да игра кошарка на 11-годишна возраст, заедно со неговиот брат Александар во младинските школи на “КК Работнички”, како и во кадетската и јуниорската репрезентација на Македонија. На возраст од 16 години го направил своето деби во првиот тим на клубот. 

Со репрезентацијата на Македонија, на Европското првенство 2011 во Литванија, Перо Антиќ го освои четвртото место.

По враќањето од Евробаскетот во Литванија, заедно со членовите на националниот тим, тој ја добил академската титула „Хонорис кауза“, доделена од страна на Универзитетот „ФОН“.

Перо Антиќ е деветтиот претседател на МКФ. По осамостојувањето на Македонија прв претседател на МКФ беше Благоја Самаковски во периодот од 1992-93, потоа Зоре Темелковски (1993-97), Јордан Камчев (1997-1999), Горан Рафајловски (1999-2001), Леонид Гајдаџиев (2001-04), Драгољуб Арсовски (2004-05), Даниел Димевски (2005-15), Петар Наумоски (2015-19).

Инаку Перо Антиќ беше изборан од македонската кошаркарска јавност за најдобар кошаркар на нашата земја за 2017 година откако со тимот на Фенербахче стигна до титулата во Евролигата.