Првата од двете контроли меѓу Македонија и Србија заврши со заслужена победа на македонската селекција од 37:31 така што на убав начин беше најавен настапот на Светското првенство во Германија.

Македонија покажа дека е подготвена да влезе во битка за нов пласман, но она што вчера беше одиграно на ниво ќе мора да биде уште подобро од 11 јануари во Германија и во Данска.

Стартот на средбата мина во грч во кој селекцијата на Србија успеа да искористи шанса за да биде во трка за резултат.Неколку интересни минути во продолжение донесоа менување на репрезентацијата која е во водство. Немаше никакви шанси за да се дојде до поголема предност, па остана минималното водство до 6:6 во 11. минута.

Србија не успеа да дојде до израмнување. Силниот ритам продолжи, па играта овозможи да се зголемува предноста. Првиот гол од Кире Лазаров дојде дури во 19. минута за водство од 11:8, па ова беше знак дека Македонија има целосна контрола на средбата.

Предноста се зголемуваше и во следните минути, а Македонија играше главно со седум ракометари во напад. Ова даваше простор за лесни голови на Србија кога имаше грешки. Сепак, после 16:13 за две минути Македонија успеа да зададе силен удар и да обезбеди три гола со кои на одмор замина со 19:13. Денеска двете репрезентации ќе одиграат уште еден натпревар, но тој ќе биде од затворен тип.