69- годишна жена загина, откако вчера околу 14.30 часот на булеварот „Јане Сандански“ во Скопје била прегазена од возило марка „Тојота ленд крузер“ со скопски регистарски ознаки, управувано од И.В.(39) од Скопје.

Со возило на Итна медицинска помош 69 годишната Ц.И. била пренесена во Градската општа болница „Свети Наум Охридски“, каде и биле констатирани тешки телесни повреди, а во 18.30 часот, не издржала и починала.

Увид на местото на настанот извршила екипа од СВР Скопје. По наредба на Јавен обвинител, телото на починатата било дадено на обдукција. Се работи на расчистување на случајот.

Црната статистика загрижува, бидејќи секојдневно се случуваат сообраќајни незгоди во кои страдаат пешаци, загрижува фактот дека околу 25% од вкупниот број жртви во сообраќајни незгоди се пешаци.

Анализите на Републичкиот совет за безбедност на сообраќајот на патиштата,  покажуваат дека најчести причини за сообраќајни незгоди во кои страдаат пешаците се брзото возење во населени места, алкохолизираните возачи и пешаци, несоодветната сообраќајна инфраструктура, несоодветната видливост на пешаците во сообраќајот и учеството во сообраќајот со одвлечено внимание, како од возачите така и од пешаците.