Македонскиот репрезентативец Езџан Алиоски реши да ја мине паузата во својот роден град Прилеп, но се најде во доста незгодна ситуација, затоа што со семејството беше избркан од еден од градските ресторани.

Алиоски достави допис до редакција на гол.мк во кој вели дека влегол со еден од братучедите во прилепски ресторан, по што направиле нарачка.

Кога дошло неговото семејство, вработените ги чуле дека разговараат на албански јазик, во случајов мајчин јазик на неговото семејство, па решиле да им кажат дека мора да заминат.

Фудбалерот бил фрапиран од односот на вработените кон него, со оглед дека е македонски репрезентативец и игра во дрес со државниот грб, а откако тие сфатиле кого го избркале, веќе било доцна.

Алиоски е револтиран од целата ситуација, а нормално, овој потег на прилепчани е за тотална осуда. Македонскиот фудбалер е по потекло од селото Црнилиште, но на една година заминал со семејството да живее во Швајцарија.

Алиоски ја започнува својата клупска кариера во вториот тим на Јанг Бојс каде во периодот од 2010 до 2013 постигнал 4 гола на 57 натпревари. Во јануари 2013 година преминал во Шафхаузен како позејмен играч каде подоцна прави и целосен трансфер. За тимот на Шафхаузен постигнал 4 погодоци на 77 натпревари.

Во јануари 2016 година, Алиоски преминал во редовите на прволигашот Лугано на заем до крајот на сезоната 2015-2016.

Своето деби за Лугано го направил на 13 февруари во поразот со 2-1 од Тун. Иако бил доведен како лев бек, тренерот на Лугано Зденек Земан увидел во него голем напаѓачки потенцијал и започнал да го користи понапред како десно крило па дури и како напаѓач до крајот на сезоната. Својот прв погодок за клубот го постигнал на 11 мај 2016, во победата со 4-0 над Цирих.