На 5 мај албанските власти отстранија 35 сообраќајни знаци на грчки и албански јазик лоцирани на југ од земјата, предизвикувајќи контроверзии околу националниот суверенитет и грчкото малцинство во Албанија.

Албанската патна управа (АРА) изјави дека патните плакати не ги исполнуваат безбедносните норми ниту пак ги почитуваат законите со кои се регулира редот, големината и фонтот во кој треба да бидат прикажани албанските и малцинските јазици.

Албанија има грчко малцинство кое се состои од 0,9 отсто од населението од 2,94 милиони жители, главно живеејќи на површина од 5.000 квадратни километри на југ, во близина на границата со Грција. Грчкиот јазик е официјален јазик во општините каде што етничкото население надминува 20 проценти, а сообраќајните знаци на двата јазика во такви области не се невообичаени.