17 годишното момче кое синоќа почина по убодните рани од нож, во паркот на Музиката во Ново Лисиче, бил кошаркар од редовите на МЗТ Аеродром.

Денеска кошаркарскиот клуб МЗТ Скопје по убиството на Никола Христовски, посвети статус со кој се простува од својот кошаркар. Нивниот статус ви го пренесуваме во целост.

Со голема тага и неверување утринава ја примивме веста за трагичната см рт на нашиот доскорешен член, Никола Христовски (17 години), кој синоќа беше прободен со нож во населбата Ново Лисиче. Сѐ уште не можеме да веруваме дека тој повеќе нема да биде со нас, а вечно ќе се сеќаваме на моментите од изминативе неколку години кога можевме да го видиме неговиот секогаш ведар лик на тренинзите на нашата младинска школа.Тренерите кои работеа со него секогаш ќе го потенцираат неговиот ентузијазам и љубов кон кошарката и кон МЗТ Скопје Аеродром.На неговото најблиско семејство, роднини, пријатели и на сите кои барем малку го познаваа Никола им изразуваме длабоко сочуство за големата загуба, со надеж дека ваква трагедија никогаш и никому повеќе нема да се случи, пишува во нивниот статус.

За потсетување, седумнаесетгодишно момче почина синоќа откако им подлегна на повредите нанесени од убод од нож. Настанот бил пријавен вчера околу 00:35 часот.

Најпрво на улицата „Февруарски поход“ започнала расправија од страна на неколку лица со А.Т. (18) кој бил во друштво со К.Д. (17), која продолжила и со физичка пресметка. Во еден момент А.Т. извадил нож и му нанел повреди на Н.Х. (17). Н.Х. со возило на Итна медицинска помош бил пренесен во комплексот клиники „Мајка Тереза“ за укажување на лекарска помош, каде починал, а А.Т. е пронајден и приведен во полициска станица.