Гласањето вчера помина одлично без никаков проблем. Одличен почеток за овој изборен процес. Денеска избирачките одбори нема да носат заштитна опрема – скафандери, односно, бидејќи се работи за лица кои се третираат како болни и изнемоштени – повозразни лица, како и затворениците, ќе носат само маски и ракавици, изјави за Утрински брифинг претседателот на ДИК, Оливер Деркоски.

-Граѓаните видоа и вчера, а ќе видат и денес дека преземени се сите безбедносни протоколи.

Тој се огласи и по сите шпекулации за вчерашното гласање и истакна дека нема броење на гласовите.

-Нема никакво броење на гласовите од вчерашниот ден. Сите оние шпекулации кои се појавија на социјалните мрежи се чисти шпекулациии и невистини, додаде Деркоски.

Имено денеска е втор ден од гласањето за предвремените парламентарни избори. Гласаат болните, немоќните, хронично болните, затворениците, лицата во домашен притвор, во старските домови и шестмина внатрешно раселени лица.

Според последните податоци на Државната изборна комисија (ДИК) објавени на нивната веб-страна, денеска гласаат 8.855 болни и немоќни и хронично болни чии пријави се прифатени од ОИК. 

Лицето кое гласа задолжително носи заштитна маска или шал или марама или прекривка преку нос и уста. При самото влегување во внатрешниот простор, најпрво лицето кое гласа треба да ги дезинфицира рацете, при подавање на личната карта најпрво ја симнува накратко маската за идентификација, но мора да ја запази потребата дистанца од метар до метар и половина. По завршеното гласање лицето повторно ги дезинфицира рацете.Членовите на ИО маската ја менуваат на секои четири часа.