Законот за ЈО ќе го донесеме со или без ВМРО-ДПМНЕ, кога ќе обезбедиме 80 пратеници, односно двотретинско мнозинство. Овој закон е многу важен и нема да дозволиме да не биде однесен поради нечии опструкции. Ова денеска во Дневникот  за ТВ24 го изјави министерката за правда Рената Дескоска.

Таа истакна дека Мицкоски денеска на прес конференцијата практично кажал дека главен проблем за ВМРО-ДПМНЕ е членот за продолжувањето на предметите на СЈО.

Но, овие предмети се веќе трансферирани во ЈО и немаме намера да се враќаме назад. Предметите на СЈО ќе продолжат, а можеме да разговараме за евентуални форми што ова би го дорегулирале.

Таа рече дека не е против ревизија на предметите од СЈО доколку тоа е услов да продолжат разговорите за донесувањето на законот.

Што предвидува законот за ЈО? 

Сите случаи кои беа во надлежност на СЈО, а ги презеде државниот обвинител Љубомир Јовески да бидат предадени во рацете на шефицата на обвинителството за гонење на организинран криминал и корупција Вилма Русковска.

Тоа го предвидува новиот предлог закон за Јавното обвинителство кој го изготвува Министерството за правда.

Од ова е извесно дека власта се откажува од идејата за формирање ново обвинителство за гонење на висока корупција, што и беше понудено на опозицијата во преговорите за законот. Ова решение е предвидено во членот 108 во делот на Преодни и завршни одредби.

„Основното јавно обвинителство за гонење на организиран криминал и корупција ги презема надлежностите од Јавното обвинителство за гонење на кривични дела поврзани и кои произлегуваат од содржината на незаконското следење на комуникациите, согласно Законот за јавно обвинителство за гонење на кривични дела поврзани и кои произлегуваат од содржината на незаконското следење на комуникациите“, се вели во став 3 од тој член.

Предложената верзија пропишува и обвинителите од СЈО кои досега беа надлежни и натаму да ги застапуваат предметите, со што се зацвстува нивната позиција. Освен тоа, се очекува тие наскоро и формално да се вработат во Обвинителството на Русковска. Во членот 109 е предвидено во рок од 30 дена од влегувањето во сила на овој закон, Советот на јавните обвинители по предлог на Русковска да донесе одлука за зголемување на бројот на јавните обвинители во тоа обвинителство, по што во ќе се распише оглас за нивен избор.

Предлогот пропишува т.н. бомби кои не се предадени во судовите да се чуваат во Државното јавно обвинителство, а по истекот на три години од правосилното завршување на постапките тие материјали да бидат уништени, согласно законот.