Александар Василевски-Нинџа и Абдуљфета Алими се единствените двајца обвинети за 27 април кои добија затворски под 10 години затвор, а истите Кацарска ги спомена и пред соопштувањето на казните. 

На последните рочишта од судењата, Нинџа неочекувано сведочеше против одредени лица од поранешното раководство на ВМРО-ДПМНЕ и прстот за тоа кој ги организирал протестите за “Заедничка Македонија”  го впери кон одредени лица како поранешниот директор на УБК Владимир Атанасовски, Кирил Божиновски, Билјана Бришкоска, Митко Чавков и други.  

За Нинџа, судијката Добрила Кацарска посочи дека е неспорно оти бил во контакт со дел од обвинетите и знаел дека ќе се влегува во Собрание со фантомки што може да се види и од снимките кај ресторанот „Дион““ каде тој гледа во кесата со фантомки. 

Сите дејствија, потенцираше таа, детално се наведени во писмената пресуда.

Но, факт е дека тој на 27 април, не влезе во Собранието и нема преземено никаков физички напад.

За Алими, пак, кој е дел од собраниското обезбедување, судијката посочи дека очигледно од снимките е дека тој е присутен кај главните врати во Собранието и се однесува пасивно односно не презема ништо.

Од друга страна, пак, Кацарска го посочи и тоа што Алими придонел пратеникот Зијадин Села да остане жив.

Спасителот  на Села, Абдулфетах Алими давајќи исказ на рочиштето за случајот во кој се обвинети 10 лица за обид за убиство на Зијадин Села во настаните од 27 април изјави дека толпата барала албанска крв.

„Во салата во која се одржуваше прес-конференцијата видов бесни демонстранти кои со тврди предмети гаѓаа кон пратениците. Слушнав како велеа дека бараат албанска крв меѓу кои и на Зијадин Села, Талат Џафери и Зоран Заев. Ние се обидовме да ги заштитиме, но ситуацијата излезе од контрола“, изјави Алими, кој во моментов се наоѓа во притвор. 

Исто така беше споменато дека клучот од главните врати бил кај обвинетиот Абдулфета Алими, кој подоцна му го предал  на обвинетиот Горан Ѓошевски – Леви, шеф на личното обезбедување на Трајко Вељаноски.