Мухамед Красниќи алијас Командант Малишева, еден од осудените на доживотен затвор за вооружената престрелка кај „Диво Насеље„ со апел на социјалните мрежи за поддршка на уставните измени и премиерот Заев.

Апел кон сите албански партии во Северна Македонија. Ја користам приликата да ги повикам албанските партии да ги спојат идеите со цел после отварањето на Уставот да ги искористат овие прилики и да им стават крај еднаш засекогаш на недоразбирањата и да ја постигнат целта за витализирање на правата кои му припаѓаат на албанскиот народ, не заборавајќи дека Албанците се уставотворен народ.

Не ги заборавајте паднатите борци од 2001 па се до мај 2015 во Куманово. Приликата е идеална бидејќи и премиерот Зоран Заев е заинтересиран за затварање на отворените прашања и со Албанците. Ако не го направите ова да знаете дека народот ке ве проколни и ке умирате секој ден!

Слава на паднатите борци.

Оружената престрелка меѓу терористичката група и полицијата се случи на 9 и 10 мај 2015 година. Жителите на кумановското Диво Насеље рано изутрината ги разбудија рафали кои продолжија во наредните 48 часа, држејќи ја под опсада населбата.

Во оружената престрелка покрај осумтемина припадници на полициските сили, беа убиени и 10 припадници на вооружената група. Како што тогаш информираше МВР, криминално-терористичката група броела четириесетина членови.

Во борбите со полицијата биле убиени 10 членови на групата, а се предале 28.

Како водачи на групата се посочуваат Мухамед Красниќи – командант Малишева, Мирсад Ндрецај (командант Нато), Сами Укшини – командант Соколи и други. Истата група беше посочена и дека претходно го извршила нападот на караулата Гошинце. Полицијата го осуетила нивниот план за напади на државни и на цивилни цели.

Во ноември 2017 година, Основен суд Скопје 1 ги изрече првостепените пресуди против обвинетите. Осуммина обвинети за тероризам и терористичка организација за настаните во кумановско Диво Насеље добија доживотни казни затвор, 13 обвинети добија по 40 години затвор, шестмина по 20 години, еден обвинет 18 години, двајца по 14 години, двајца по 13 години затвор и двајца по 12 години затвор.

Косовската влада во февруари годинава донесе одлука на семејствата на осудените во случајот „Дива Населба“ да им исплати 219 илјади евра. Средствата им беа доделени на семејствата на осудените за тие да ги покријат трошоците во судската постапка.

Премиерот Рамуш Харадинај даде објаснување дека за секое семејство се доделуваат по 10 илјади евра.