Поминува веќе четврти ден од катастрофалниот пожар во Париз, кој речиси целосно ја опустоши париската катедрала Нотр Дам.

Експертите изразија стравување од уривање на трите главни елементи на нејзината структура, јави вчера дописникот на МИА.

Францускиот министер за култура Франк Ристер вчера изјави дека овие три „точки се многу кревки“, нагласувајќи дека во тек се активности за нивно „отстранување, зајакнување и консолидација“.

Во вторникот, откако пожарникарите успеаја да го изгаснат пожарот, командант на париската противпожарна бригада, генерал Жан-Клод Гале изјави дека „можеме да сметаме оти структурата на Нотр Дам е спасена и зачувана во целост“. Но, изминативе денови пожарникарите и експертите открија неколку критични точки во структурата на Богородичната црква.

– Остануваат три главни кревки точки во катедралата Нотр Дам, на која се работи тековно, нагласи Ристер.

Вчера исто така беше објавено и дека најверојатно краток спој го предизвикал катастрофалниот пожар во катедралата Нотд Дам. Ова официјално го потврди анонимно лице на француската судска полиција.

Како што напомена тој поради безбедносни причини, лицата кои ја водат истрагата се уште не добиле зелено светло за работа во катедралата, пренесува АП.

Претседателот на Франција Емануел Макрон најави дека е потребен петгодишен план за обвнова на Нотр Дам, а стручните лица сметаат дека ова е премногу амбициозно. Тие проценуваат дека обновата ќе трае и до 15 години.