Водечките светски медиуми известуваат за состојбата во главниот град на Украина, Киев, каде има скоро 50 новороденчиња во еден хотел.

Наведено е дека станува збор за сурогат бебиња чии родители од Велика Британија, САД, Италија, Германија, Романија и други земји не можат да дојдат затоа што границите се затворени поради пандемијата на корона вирусот, пренесува британскиот „Дејли мејл“, наведувајќи дека ова изгледа како фабрика за бебиња.

Според весникот, родителите платиле меѓу 5.745 и 57.365 фунти на агенција која им помогнала во сурогат мајчинство.

Персоналот се грижи за децата, но сликите го алармираа народниот правобранител за човекови права на украинскиот парламент, Људмила Денисова.

„Видеото се прошири на социјалните мрежи и беше споделено преку веб-страницата на една од клиниките во Киев. На видеото се прикажани 46 бебиња кои во моментов се наоѓаат во еден од хотелите во Киев.

„Сите овие бебиња ги родија сурогат мајки за граѓани од разни странски земји“, рече таа.

Според РТ, сурогатството не е експлицитно забрането во Украина и е во легалната сива зона. Оние кои стојат зад договорот со новороденчиња може да бидат обвинети за трговија со луѓе според релевантни закони, но официјалните лица се чини дека не се во можност да го намалат бумот на сурогат во земјата.