МВР стана нетраспарентна институција во сопственост на граѓаните а во владение на партијата т.е. токму она за што СДСМ обвинуваше дека не смее да биде.

Вчера конечно по три дена се огласи и МВР со соопштение кое е чист бирократски документ полн со празни фрази за кои никој не поставил прашање:

“По извршените проверки – констатирано е дека на ден 2 август 2018 година – возилото “Ренџ Ровер Дискавери Спорт” со регистарски таблички СК-9559-АЛ е управувано од полициски службеник вработен во Одделот за заштита на определени личности и објекти кој возилото го управувал со соодветен службен налог. Возилото во 13 часот и 35 минути го преминало граничниот премин Богородица и патувало на територија на Република Грција. Возилото е вратено во Република Македонија истиот ден 2 август 2018 година.”

Како би ја ослесниле работата на министерот Спасовски еве ги прашањата на кои треба да се фокусира:

1. Колку изнесуваат трошоците во патниот налог за патување и тоа во странство за државен празник?

2. Кој функционер го користел возилото за патување во Грција?

3. Дали во возилото имало и други – неовластени лица на МВР?

4. Во колку часот полицискиот службеник влегол во Македонија на “Богородица”?

5. Дали бил сам во возилото при излезот но и влезот на граничниот премин “Богородица”?

Прашањето никогаш не беше дали возилото е или не управувано од ќерката на Велковски. Би било навистина гест кој не е џентлменски ако не и бил обезбеден и шофер. Спасовски ако не сака МВР да наликува на она кое го сметаше за “режимско” прво може да не испраќа “режимски” дописи со општо појаснување.