Кривичниот суд пред десетина дена му го укинал куќниот притвор на поранешниот министер за транспорт и врски Миле Јанакиески за предметот „Титаник“, кој се однесува на изборни нерегуларности, но и понатаму му важи куќниот притвор за 27. април.

Одбраната на Јанакиески вели дека укинувањето е резултат на тоа што не може паралелно да бидат активни две мерки куќен притвор.

За 27. април имам куќен притвор и забрана за комуникација со инволвирани лица во настанот. Тоа по закон значи да не смеам да пуштам маилови и да комуницирам на мобилен со нив, рече Јанакиески денеска.

Во тој предмет на Јавното обвинителство како осомничени за организација на крвавите настани се водат поранешниот премиер Никола Груевски, поранешниот спикер Трајко Вељановски, поранешниот директор на УБК Владимир Атанасовски и екс началникот Никола Бошковски како и поранешниот министер Спиро Ристевски.

Јанакиески денеска во Судот се појави на рочиште за предметот „Титаник“, на Специјалното јавно обвинителство.

 Овој предмет е во доказна постапка, а освен него обвинети за злосторничко здружување, повреда на избирачкото право, уништување изборен материјал и злоупотреба на средства во финансирање на изборна кампања се и бегалецот Никола Груевски, Гордана Јанкулоска, Кирил Божиновски, Илија Димовски и др. За овој предмет, во куќен притвор е само Божиновски.

 Денешното рочиште се одложи поради отсуство на судијата Огнен Ставрев.