Заврши и 92-рото доделување на Оскарите, но се уште се собираат импресиите од филмската ноќ. Имавме можност да видиме многу гламур на едно место, тоалети и смокинзи кои чинат цело богатство а богами и целата организација чинела многу скапо. Доделувањето на престижниот Оскар во театарот „Долби“ во Лос Анџелес чинеше вкупно 44 милиони долари, од кои 24.700 долари се потрошени на црвениот тепих.

За поставување на црвениот тепих, долг повеќе од 1.500 метри квадратни, биле потребни 900 часа работа и тим од 18 лица. Дел од тепихот ќе биде рециклиран, а дел ќе биде дониран во хуманитарна организација.

Во големата сала на театарот „Долби“, биле поставени околу шест километри електрични кабли и околу два километри драпери за потребите за приемот на гала вечерта по доделувањето на Оскарите. За поставување на драперија биле користени околу 32.000 главни делови.

Наградите на академијата широко познати како Оскари (англиски: The Academy Awards или Oscars), се годишно доделувани филмски награди од Академијата за филмски уметности и науки (АМПАС) како признание за одличноста на професионалците од филмската индустрија, вклучувајќи глумци, режисери и сценаристи. Свечената церемонија на која се доделуваат наградите е една од најважните филмски церемонии во светот и истата се емитува во живо во повеќе од 200 држави. Важи и за најстара медиумска церемонија; нејзините еквиваленти, наградите Греми (за музика), Еми (за телевизија) и Тони (за театар) се изработени по образец на Академијата.

Академијата за филмски уметности и науки е основана од Луис Б. Мајер, шефот на филмското студио Metro-Goldwyn-Mayer, но всушност, актерот Даглас Фербенкс е заслужен за отпочнување на наградната церемонија. Наградите се доделуваат во повеќе категории, но постепено, одредени категории се отстранети, а постојат и специјални награди кои се доделуваат периодично. Самата статуетка наречена е Оскар, а позната е и како Награда на акадамијата за заслужност, иако потеклото на името сè уште не е утврдено.