По налог на ОЈО, утре во 12 часот сум на разговор во полиција затоа што како уредник на “Лидер” ја објавив снимката на која се слуша како градоначалникот на Шутка, Курто Дудуш, киднапира и тепа човек, пишува новинарот Љупчо Златев на Фејсбук.

-Да драги, според обвинителството на Јолевски, не е проблем тоа што овој крвник тепал човек, проблем е што некој го снимил и снимката ми ја дал мене. Изворот никогаш нема да го откријам. А Јовески, кој буквално е во љубовна врска со власта, нема да ме замолчи и покрај тоа што неговите политички ментори го бараат тоа од него во предизборието!, додава Златев.

За потсетување порталот Економски Лидер каде токму новинарот Златев е уредник беше првиот кој ја објави аудио бомбата на која се слуша како Дудуш киднапира, тепа и се заканува на човек во неговата канцеларија.

Свиркачот, кој е вработен во општината и вели дека повеќе не може да го трпи однесувањето на градоначалникот, ја даде целата снимка на Лидер од 18 минути од кое е извадено 2 минутното парче кое го објавивме вчера.

-Насилникот тепа, а вели дека вас ќе ве тужел. Обвинува дека било монтирано, а јасно се гледа дека тепал. Тргнати беа само деловите во кои има и други луѓе, некои му помагаат во тепањето, а некои го одвраќаат. Еве ви го цело видео. Вели дека ќе тужел и кажува дека тепаниот е осуденик, а тој го избра да му биде најблизок соработник. Сега го тепа. Кој е Куцо да тепа? Полиција? Суд? Еве ви го целото видео. Нека видат сите каков човек е! – вели свиркачот.