Жена од Кавадарци доживеала вистински хорор кога легнала на својата постела да спие. Во креветот и се пикнала змија која ја каснала жената, ова не е прв случај во Кавадарци жител да се пожали на змии.

Како што информира за МИА раководителот на Брза помош Драган Димитров, првиот случај бил од пред околу две седмици, а вториот бил регистриран во вторникот изутрина околу осум часот.

– Змијата всушност им влегла дома најверојатно поради тоа што жената живее на приземје, па се сокрила во ќебето на креветот. Се случило кога домаќинката решила да си легне и да спие. Тогаш дошло до каснувањето, жената навистина многу се исплашила кога ја запалила струјата и ја видела змијата. Додека да ги викне најблиските, змијата избегала. Сега никој не знае каде е. Кавадарчанката веднаш дојде кај нас во Итната медицинска помош. Доби серум против змиски отров, имаше типично змиско каснување со два заба. Според неа, најверојатно се работи за поскок, раскажа докторот.

МИА стапи во контакт и со синот на 64 годишникот кој бил каснат од змија во кавадаречко село.

-Реновиравме во селото кај што живеат моите. Го менувавме кровот на куќата. Заедно бевме. Го собравме шутот, отпадот што беше испопаѓан од страните на куќата, ѓубрето, кое стоеше неколку дена во дворот. Го оставивме во приколка и тогаш забележавме дека во отпадот всушност од претходно се пикнала змија. Сѐ се случи за миг. Таа се почувствува загрозена и најверојатно за да се одбрани, го касна татко ми на раката. Два дена лежеше во кавадаречката болница, во ургентниот центар, појасни синот кој живее во Неготино.

Според него, била од оние змии кои во нивниот крај биле познати како брзострелки, а се движеле и по дрвја и по гранки. Тенки, долги околу еден метар, отровни.

За среќа и мажот и жената се во добра здравствена состојба.