Во Софија денеска започна лидерскиот Самит за Западен Балкан во рамките на Берлинскиот процес, на кој оваа година ко-домаќини се Република Бугарија и Република Северна Македонија!

Македонската делегација, предводена од премиерот Зоран Заев, а во која се и вицепремиерите Никола Димитров и Фатмир Битиќи, како и министерот за надворешни работи Бујар Османи, пристигна во Софија каде што земјава заедно со Бугарија претседава со Самитот за Западен Балкан во рамките на Берлинскиот процес.

Имаме силна и очигледна политичка поддршка за процесот на проширување со земјите од регионот и треба да ја зграпчиме оваа шанса и да ја искористиме за доброто на сите граѓани, рече Заев!

Новата динамика во процесот на пристапување на земјите од Западен Балкан во ЕУ, пакетот за проширување од Европската комисија и сериозниот Економски и инвестициски план, заедно со напорите на Германското претседателство со Европскиот совет, е извонредна можност регионот на Западен Балкан сигурно да напредува кон ЕУ.

Пандемијата уште повеќе го обедини Западниот Балкан во борбата против невидливиот непријател, донесувајќи толеранција и соработка и создавајќи заедничка свесност дека хуманоста има предност пред политиката. Убеден сум дека со постигнатите резултати во текот на оваа година успеавме да ја збогатиме регионалната соработка и да го приближиме регионот кон ЕУ.

На отворањето на лидерскиот Самит за Западен Балкан во Софија се обративме со премиерот Борисов, а свои обраќања имаа и канцеларката на СР Германија, Ангела Меркел и претседателката на Европската комисија, Урсула Фон дер Лајен.

Во Софија денеска се очекува да стане збор и за преговарачката рамка за земјава за која Бугарија веќе ја стави првата блокада, а која ќе биде тема на дневен ред на Советот за општи работи на ЕУ за една недела, на 17 ноември.