Секој мировен договор со Русија ќе зависи од повлекувањето на руските сили на нивните позиции пред инвазијата, вели украинскиот претседател, Володимир Зеленски. Посочи дека тоа е минимумот што неговата земја може да го прифати. Додаде дека е лидер на „Украина, а не на мини-Украина“, но не го спомна Крим, кој Русија го анектираше во 2014 година, пренесува „Би-Би-Си“.

Русија во моментов се бори да ја преземе целосната контрола над градот Мариупол. Се уште има украински сили заедно со некои цивили во огромната фабрика за челик Азовстал во југоисточниот дел на градот, која беше подложена на жесток руски напад. Конечното заземање на Мариупол би било најголемото достигнување на Русија во два месеци војна и ќе му даде на рускиот претседател Владимир Путин нешто за славење на 9 мај, кој е Денот на победата во Русија – денот кога ја одбележуваат советската победа над нацистите во Втората светска војна.

Сепак, говорејќи од Киев, Зеленски рече дека не може да се зборува дека Русија ќе ја задржи територијата што ја освои откако ја нападна Украина.

„За да се запре војната меѓу Русија и Украина, чекорот треба да биде враќање на ситуацијата од 23 февруари“, рече тој, одговарајќи на прашање на Би-Би-Си, осврнувајќи се на денот пред војната.

„Народот на Украина ме избра за претседател на Украина, а не за претседател на некаква мини-Украина. Ова е многу важна точка“, додаде тој. Повикувањето на ситуацијата на 23 февруари сугерира дека Украина можеби нема да инсистира на враќање на Крим пред да склучи мир со Русија. Полуостровот беше припоен од Русија пред осум години.

Зеленски повика на продолжување на дипломатскиот дијалог меѓу Русија и Украина: „И покрај тоа што ги уништија сите наши мостови, мислам дека сè уште не се уништени сите мостови, фигуративно кажано“, рече тој.

Русија, од своја страна, го опиша преговарачкиот процес како „стагнација“ и ги обвини Украинците за „одложување“.