Бугарија ќе продолжи да ги штити своите национални интереси и на крајот на денот ние сме во ЕУ, а не Македонија, повтори бугарскиот вицепремиер Красимир Каракачнов во телевизиско интервју.

Бугарија има свои национални интереси и треба да ги штити како тоа што го прават и други членки како Германија, Полска, Унгарија вели бугарскиот вицепремиер и министер за одбрана, Красимир Каракачанов во интервју за бугарска телевизија „Нова“, прашан за тоа како на европските партнери им ги објаснил мотивите на Бугарија за ставање вето за Македонија.

„На крајот на краиштата Бугарија е членка на ЕУ, а не Македонија и нашите колеги треба да ги имаат предвид ставовите на државите-членки, а не државите-кандидатки. Го објаснив тоа на културен начин со аргументи и факти. Не мислам дека не сме разбрани од страна на европските партнери. Бугарија никогаш не давала безрезервна поддршка. Ние кажавме дека ако Договорот не се почитува, нема влез во ЕУ“, вели Каракачанов.

– Не можам да кажам дека имаме притисок за да го смениме мислењето, но ќе кажам дека има надворешни фактори што не разубедуваат, иако мене лично не. Не верувам дека ниту Борисов ќе ја свие опашката, заклучи Каракачанов.