Од пријавени четири компании, Државната изборна комисија од германската „Дермалог“  ќе го набави Системот за биометриска идентификација на гласачите со отпечаток од прст.

Изборот на компанијата бил направен вчера од кога почна да тече десетдневниот рок за поднесување на жалби.

Претседателот Александар Даштевски појасни дека врз основа на тоа што го видел од извештајот на Комисијата за јавни набавки, оваа компанија ги исполнила условите, имала најдобра понуда, и најдобри апарати, а рокот за достава на опремата е до септември.

Тој кажа дека ова е доволно време за да се извршат обуките пред локалните избори во октомври.

Рокот за достава на техничката опрема е 60 дена што значи дека ако постапката трае 10 дена имаме време до крајот на септември да стигне опремата кај нас. Испораката ќе биде на два пати. Првиот пат ќе биде околу пет отсто, некаде околу 200 апарати на кои ќе биде извршена обуката. И после тоа остатокот само да се наполни, за што ќе треба неколку дена.вели Александар Даштевски – Претседателот на Државната изборна комисија.

Во однос на правилата за чувањето и дистрибуцијата на опремата и останатите детали, претседателот на ДИК беше воздржан и посочи дека би почекал да заврши постапката за жалби, а потоа покрај правилата предвидени во Законот, ДИК ќе донесе и Уредба. Даштевски гарантира дека податоците на граѓаните нема да бидат злоупотребени.

Гаранциите се предвидени во тендерот и може да се прочитаат во постапката за спецификацијата, податоците ќе се внесат од страна на МВР и после ќе се вратат назад, така што не може да бидат злоупотребени, ние не купуваме компанија туку опрема, таа е во наша сопственост.“вели Александар Даштевски – Претседателот на Државната изборна комисија.

ДИК веќе направила стратегија во која се предвидени сите мерки за заштита од пад на системот, како на минатите предвремени парламентарни избори. Во моментов се врши јавна набавка за Апликација за текот на гласањето и за првичните неофицијални резултати. Локалните избори се очекува да бидат распишани од собранискиот спикер Џафери во август, а да се одржат во втората половина на октомври.