Поранешниот министер за надворешни работи Антонио Милошоски ги „поздрави“ актуелниот шеф на дипломатија Никола Димитров и експремиерот и лидер на СДСМ, Зоран Заев, по најавата од бугарскиот премиер Бојко Борисов за вето на Македонија за Европската унија ако не ги исполни условите на Бугарија.

„ЕУ им определи „специјален, безусловен и мало сутра” датум на Зоран Заев и Никола Димитров, прецизен до секунда, соопштен јасно и дрско од премиерот на земјата на источните дијалекти Бојко Борисов во 42мин и 30 секунди, На здравје бричење предавници“, напиша Милошоски на Твитер.

Бугарскиот премиер, Бојко Борисов имаше прес-конференција за самитот во Загреб на која најави вето ако Македонија не го исполни договорот. Според Борисов, сите земји го поддржале, односно дека исполнувањето на договорот е дел од заклучокот на ЕУ.

Борисов јасно, гласно и директно потенцира дека „сите членки на ЕУ ја поддржаа Бугарија, а ако Македонија отстапи од Договорот ќе ja блокираме во секое поглавје од преговорите.“

„Ние работиме по документи, тоа е документот по кој ќе работи Бугарија во иднина, сите членки на ЕУ го поддржаа. Ако Македонија не сака да го прифати, никој не ја тера со сила да влезе во ЕУ.“