Првиот случај на новиот вид коронавирус кој првично беше откриен во Велика Британија е откриен во Русија, објави денеска Ана Попова, директор на руското тело за надзор на здравјето „Роспотребнадзор“.

Како што рече, станува збор за руски државјанин кој се вратил од Велика Британија, пренесува РИА Новости.

Агенцијата потсетува дека Русија минатиот месец ги прекина летовите кон Велика Британија, откако беше откриен нов вид на вирус во таа земја.

Бројот на потврдените случаи на зараза со новиот коронавирус во светот ја надмина бројката од 88,38 милиони, односно е зголемена за 790.000 нови случаи во последните 24 часа, според податоците на Светската здравствена организација (СЗО – WHO) објавени во неделата, додека во истиот период бројот на смртните исходи поврзани со коронаинфекциите се зголемил за повеќе од 12.400, приближувајќи се до 1,92 милиони починати.