Министерот за надворешни работи и портпарол на ДУИ, Бујар Османи, вчера во дебатниот магазин „Click Plus“ на ТВ21 посочи дека тие како партија очекуваат премиерот Зоран Заев да продолжи да ја води Владата.
„Ние имаме договор со Заев како премиер, а не како градоначалник на Струмица. Тој барем уште некое време ќе треба да ја води Владата.
За тоа кој ќе биде лидер на СДСМ, тоа не не интересира, тоа е нивно внатрепартиско прашање. Но, барем уште некое време, тој треба да продолжи да ја води владата. Ние како ДУИ не сме известени за тоа кој ќе биде мандатар, слушнавме од медиумите. Но овој период само Заев е решение“, вели Османи.
Тој вели исто така дека Беса имале обврска кон ВМРО-ДПМНЕ поради соработката на локалните избори.
„Имаа договор со нив. Веројатно се договориле за гласови во вториот круг, Беса да добие гласови од ВМРО, а потоа да ја рушат Владата. Значи, не е до ДУИ, туку имаа договор Беса и ВМРО. ДУИ е дежурен виновник за сите партии, и за ВМРО, и за СДСМ и за албанските партии, ДУИ историски е дежурен виновник. ДУИ секогаш е конзистентна како партија. Ние во континуитет ги штитиме интересите на државата. Од 2001 до денес, секогаш не напаѓаат за разни основи, но еве 20 години после 2001 година ние имаме сериозни процеси за државата. За ДУИ не е важно дали ќе остапиме министерско место за да се зголеми мнозинството“, додаде Османи.
»Вестите на порталот MAGAZIN.MK може да се користат исклучиво за лично информирање. Без писмена дозвола од порталот или посебен договор, не е дозволено превземање, користење или реемитување на вестите, во спротивно ќе следи фактурирање на име "плагијат" во вредност од 20.000 денари.
You must be logged in to post a comment.