Најмалку 17 лица починаа денес како резултат на ненадејниот студен бран што го зафати Авганистан, соопштија официјални лица во Кабул.

Снеговите продолжуваат да паѓаат во делови од земјата, а властите соопштија дека списокот на жртви сè уште не е конечен, пренесува Ројтерс.

„Не очекувавме ваков ладен бран. Добивме извештај дека обилните снежни врнежи имаат последици, но во моментов немаме прецизни податоци за бројот на жртви“, соопшти Националната служба за катастрофи. 

Од Нова година, многу големи патишта се затворени поради снежните врнежи, вклучувајќи го и оној што го поврзува централниот дел на Авганистан, како и автопатот Кабул-Кандахар. Во некои делови на земјата, температурите се спуштија на минус 12 и најмалку 24 лица починаа од студот во саботата.

На западниот дел на провинцијата Херат, покривите на две куќи се срушија поради снегот, при што загинаа осум лица.
Метеоролошката служба соопшти дека ладниот бран се очекува да продолжи и во наредните недели.
Обединетите нации проценуваат дека најмалку девет милиони Авганистанци имаат потреба од хуманитарна помош, пред се во храна и засолниште.