По денешната изјава на  вице премиерот на соседна Бугарија Красимир Каракачанов дека неговата држава нема што да менува во својата политика и дека ќе се спротивстави на закажувањето на првата меѓувладина конференција, се огласи и министерката за одбрана Радмила Шекеринска која истакна дека од Бугарија очекува помош.

Таа посочи дека сега е вистински момент да се покаже колку навистина сакаме да градиме добрососедски односи и дека Македонија го помина својот тест.

Од нашите сојузници, вклучително и од пријателска Бугарија, очекуваме да помагаат, а не да одмагаат, изјави попладнево министерката за одбрана Радмила Шекеринска како одговор на изјавата на нејзиниот бугарски колега Красимир Каракачанов дека Бугарија не е против, но смета дека не е време за одржување на меѓувладината конференција за почеток на пристапните преговори наМакедонија во ЕУ.

Според Шекеринска, овие изјави на Каракачанов  не се во духот на Договорот за добрососедство со Бугарија.

Ако нешто научивме во овие 30 турбулентни балкански години е дека емоциите не се добар сојузник во решавањето на билатералните прашања. Ние покажаваме дека со сите наши соседи можеме да бидеме пријатели. Покажаваме и дека сме подготвени да инвестираме во таков сојузнички однос и ќе продолжиме да градиме и понатаму таква политика. Очекуваме нашите сојузници и нашите пријатели да му помогнат на регионот, а не да му одмагаат. Единствен начин да му помогнеме на овој регион е да му дадеме шанса да има подобра и европска иднина, рече Шекеринска на прес-конференција.