Обвинителството од Штип денеска соопшти дека отворило предмет по информациите во медиумите и ќе испитува дали има лекарска грешка во третирањето на младиот Јован Димовски кој почина на 25 години.

За смртта на Димовски се дозна преку социјалните мрежи откако неговите роднини и пријатели објавуваа постови за изразување сочувство, но револт за прерано загубениот млад живот.

„Дополнително ќе се извршат и вонредни инспекциски надзори во сите здравствени установи каде што пациентот побарал лекарска помош и тоа: матичен лекар, матичен стоматолог, итна медицинска помош Берово и ЈЗУ ТОАРИЛУЦ-ОЕ за анестезија, реанимација и интензивно лекување – Скопје при што ќе биде обезбедена медицинската документација поврзана со лекувањето на пациентот“, се вели во соопштението.

По завршувањето на инспекцискиот надзор, од ДСЗИ велат дека ќе биде изготвена комплетна информација за констатирана фактичка состојба, a ќе се иницира и формирање комисија за стручен надзор до министерот за здравство.