„Made in Macedonia“, македонски, „најдоброто од Македонија“, македонскиот рубин, македонското вино, се само дел од трговските марки кои најверојатно ќе заминат во историја поради договорот со Грција.

Уставните измени се само првата обрска која нашата држава мора да ја исполни. Потоа ќе следува формирање комисија со која ќе треба да се променат имиња и термини за комерцијална намена.

За територијата на Република Македонија од вкупно 14.556 трговски марки на македонски субјекти, 79 го содржат зборот Македонија, 77 англиската верзија на името Macedonia, а придавката македонски ја содржат 12 регистрирани трговски марки.

Кратенката МК е содржана во вкупно 93 случаи, а кратенката МАК во 35.

Во Договорот со Грција стои дека:

Двете страни се согласуваат да им дадат поддршка и да ги охрабрат нивните деловни заедници да воспостават искрен, структуиран и во добра волја дијалог, во чии рамки ќе бараат и ќе постигнуваат заемно прифатливи решенија за прашањата кои произлегуваат од имињата закомерцијална намена, трговските марки и заштитни знаци и за сите релевантни прашања, на билатерално и на меѓународно ниво.

Ова беше потврдено и од страна на македонскиот премиер Заев, кој кажа дека во наредните три години ќе треба да се решат одредени проблематики, кои не биле приоритет да бидат решени во самиот договор.

Договорот тоа го опишува, после тоа следуваат обврските на Парламентот на Грција. Со тоа после треба да почне да се применува. Односно во одредени делови имаме одредени рокови, во рок од толку и толку време ќе треба да се дефинираат одредени работи, работи кои што не беа од таков приоритет за да бидат конечно решени восамиот договор. Односно делот на она кое што таму е запишано во рок од 3 години да се решат одредени проблематики. – премиерот Заев.

Дел од стопанствениците велат дека неизвесноста околу овој проблем ги отвора прашањата дали ќе треба да се променат дел од називите на фирмите или пак на имињата на некои брендови, кои веќе се заштитени во меѓународни рамки.

Иако не сакаат да коментираат, велат државата нема право да ги ограничи во изборот на името на својот производ при што дополнително, вонредното регистрирање во Државниот завод за индустриска сопственост, промената на етикетите и рекламните материјали, за нив би значел дополнителен трошок.