Македонските претседателски избори од 2019 година — шести претседателски избори во Македонија кои треба да се одржат на 21 април 2019 година, на кои ќе се избере петтиот претседател на Македонија. 

Ова се првите избори по стапување на сила на Преспанскиот договор со кој е решен спорот за името помеѓу Македонија и Грција и земјата го добива името Северна Македонија. Претседателот во заминување Ѓорге Иванов, кој се противи на договорот, повеќе не може да се кандидира поради уставното ограничување од најмногу два претседателски мандати.

Според македонските закони, кандидатот за претседател може да победи во прв круг доколку освои над 50% од гласовите на сите регистрирани гласачи во избирачкиот список. Во спротивен случај ќе се одржи втор круг на 5 мај во кој ќе се натпреваруваат двајцата првопласирани кандидати од првиот круг. Одзивот во втор круг треба да биде минимум 40% за гласањето да се смета за важечко. Според Уставот, претседателскиот кандидат треба да има над 40 години и да биде жител на државата најмалку 10 од последните 15 години. Еден мандат на претседателот трае 5 години.

[yop_poll id=15]

Заедно со претседателските ќе се одржат и локални избори во општините Дебар, Ново Село, и Охрид за да се изберат нови градоначалници бидејќи таа функција ја обавуваат вршители на должност. Во Ново Село причина е апсењето на градоначалникот Боро Стојчев поради шверц со цигари, а во Дебар и Охрид причина е ненадејната смрт на градоначалниците Ружди Љата и Јован Стојаноски.