Министерот Венко Филипче најави дека на одредени пациенти со ковид-19 ќе се примени озонска терапија.

Од денеска, рече тој, во болницата „8-ми септември“ е пренесен апаратот за озонирање на крвта и ќе се користи за третман за најтешките пациенти.

Тимот на анестезиолози брз основа на анализата и литературата заклучил дека вреди да се направи обид и со оваа терапија и истата деновиве ќе почне да се применува.

Терапијата, според даденото објаснување, значи дека на пациентите ќе им се вади одредена количина во крвта, истата ќе се озонира и потоа повторно ќе се враќа во пациентите.

„Имаме предвид дека како причина за тешката клиничка слика е недоволната оксигенација на крвта и се смета дека со оксигенирање со озон, една количина на крв може, ми се чини 15 милилитри, се вади, се озонира и се враќа во циркулацијата и тоа може да се повтори неколку пати во денот.

Се подобрува способноста на крвта да однесе кислород до ткивата каде што е тоа потребно, така што на тоа се должат добрите резултати. Тоа е механизмот на дејствување. Како ќе се индицира, веројатно врз основа на проценка на степенот на оксигенација на крвта што е параметар кој може да се мери и се мери кај сите пациенти кои се на интензивна нега. На кратко, тоа е подобра можност крвта да оксигенира ткива во повеќе органи во организмот“, објасни Филипче.

Покрај оваа, од утре ќе почне и лекувањето на пациентите со крвна плазма. За утре, рече министерот, е закажана и првата екстракција на плазма.