Излезните анкети од парламентарните избори во Бугарија покажуваат израмнет резултат на партијата на бившиот премиер Бојко Борисов и на протестната партија на Слави Трифонов.
Ни вторите вонредни парламентарни избори во само три месеци не донесоа јасен победник во Бугарија. Излезните анкети по неделните избори покажуваат дека Има таков народ (ИТН) на Слави Трифонов и ГЕРБ на Бојко Борисов се речиси израмнети во резултатот.
Прогнозите се дека обете партии ќе обезбедат меѓу 21 и 24 отсто од гласовите на изборите кои беа одбележани со ниска излезност, и дека никој нема да има мнозинство во длабоко поделениот парламент.
Првичните проценки се дека на изборите излегле меѓу 34 и 38 отсто од гласачите, далеку под 50% колку што гласаа на априлските избори. Аналитичарите велат дека броењето на гласовите на Бугарите во странство може да се покаже клучно за исходот на изборите. На трето место се Социјалистите кои освоиле меѓу 13,5 и 15,1 проценти од гласовите.
Претседателот Румен Радев во текот на денот апелираше до своите сограѓани масовно да излезат на гласање, но излезноста остана ниска.
Најважното е Бугарите да излезат и масовно да гласаат“, рече Радев, објаснувајќи дека тоа е начинот за да се формира „енергична, предвидлива и легитимна влада“.
Во новиот парламент влегуваат уште две протестни партии кои произлегоа од повеќемесечните протести против корупцијата во земјата и владата на Борисов: тоа се десничарската Демократска Бугарија со околу 13% освоени гласови и Исправи се!Мафија надвор со околу 5 проценти.
Во идниот парламент ќе биде застапена и партијата на Турците- ДПС која освоила нешто помалку од 12%.
»Вестите на порталот MAGAZIN.MK може да се користат исклучиво за лично информирање. Без писмена дозвола од порталот или посебен договор, не е дозволено превземање, користење или реемитување на вестите, во спротивно ќе следи фактурирање на име "плагијат" во вредност од 20.000 денари.
You must be logged in to post a comment.